Tungubrot

23. ágúst 2005

Tvöfaltvaff. Tvöfaltvaff. Tvöfaltvaff. Ef ég ætti tölu yfir skiptin sem ég hef þulið þessa runu þá ætti ég, tjah, allháa tölu. Ég er nú búinn að vinna í vefbransanum í 6 ár (snýt, hóst, hóst, hræk) og er hissa á að vöðvabólga í tungurót sé ekki orðin bótaskyldur atvinnusjúkdómur meðal vefforritara. Þau eru örugglega ekki mörg málin utan íslensku sem státa af tungubrjóti í stafrófinu (ef hebreska er frátalin) og ef við höldum uppteknum hætti, þá verður aflimun talfæra eflaust fljótlega stór gjaldaliður í fjárlögum heilbrigðisráðuneytisins.

Þess vegna vil ég stinga upp á því að við breytum íslensku heiti þessa bókstafs í "ve" og fylgjum þannig fordæmi hinna síhressu og skopskynugu frænda okkar, Þjóðverjanna. Hugsið ykkur hvað það sparaði mikinn tíma og talfæraslit gæti maður sagt "veveve" í stað "tvöfaltvafftvöfaltvafftvöfaltvaff" - þetta er tímasparnaður upp á a.m.k. 70%, auk þess sem slit á tungu, gómi og framtönnum snarminnkar.

Niður með tvöfaltvaff, lifi ve!

---

Tjáskipti

Flæðið